早排阿史做嘢急住用USB，去附近商場求其買咗隻，資深同事一見到USB嘅價錢就話間嘢係「新澤西」，咁嘅價錢夠佢喺屋企樓下買2隻USB咁話。

其實「新澤西」即係食水深咁解，點解有呢個說法？話說喺香港50年代嗰陣，美國有一隻叫做「新澤西」號嘅主力艦嚟香港，但因為「新澤西」號太大，排水量超勁，食水好深，所以無辦法駛入香港海港，只能夠停喺鯉魚門外面俾人參觀。於是，就有咗「新澤西，食水深」嘅講法。

當年唔少人為咗一睹呢隻入唔到中環海港嘅「新澤西號」，專登搭小輪出鯉魚門睇，雖然唔能夠上艦艇、只可以搭船圍住「新澤西號」兜圈，仲要俾1蚊來回船費咁貴，但就有大把人爭住睇，小輪公司都要加開班次應付龐大嘅客流量，認真誇張。

圖為「新澤西」號報章照片，原圖嚟自網絡。