早喺舊年美國總統特朗普提出成立太空軍，今年2月亦簽咗有關行政命令，直至上個禮拜，特朗普終於宣布成立美軍太空司令部，但成立太空軍就要等國會批准，最快都要2020年先成事。美國其實早喺1985年就已經設立太空司令部，作為「星球大戰計劃」嘅一部分，蘇聯解體之後星戰計劃喺1993年取消，而太空司令部就一直存在，直至2001年「911」恐襲發生，第二年就解散太空司令部，將重心擺返喺本土防衛。阿史今次不如就講吓呢個星球大戰計劃到底係咩嚟喇！

話說喺1983年3月，當時嘅美國總統列根宣布，為咗確保美國同盟友喺美蘇核大戰中立於不敗之地，已經制定《戰略防禦倡議》，建立一套以定向能武器（包括微波、激光等等）為主嘅反導彈防禦系統，攔截蘇聯射過嚟嘅導彈，由於呢個計劃主要喺外太空進行，所以就被稱之為「星球大戰計劃」。星球大戰計劃响1985年正式出台，令蘇聯陷入兩難局面，令經濟實力及唔上美國嘅蘇聯，增加軍備開支，拖慢工業現代化嘅步伐。喺1986年，蘇聯領導人戈爾巴喬夫就同列根舉行歷史性峰會，希望以拆除飛彈，換取列根放棄星戰計劃，但遭到列根拒絕。

最終蘇聯喺90年代初解體，有唔少人例如英國前首相戴卓爾夫人亦「歸功」於列根嘅星球大戰計劃。不過至今有唔少人都認為，當年美國根本無能力去實現呢個星球大戰計劃，由始至終都係列根一個「完美騙局」，不過美國嘅官方解釋就話星球大戰計劃無實施只係因為有「技術缺憾」。

圖為列根，取自網絡。