上次講起，有資料提到荃灣係大快活同莎莎嘅發源地，有史友就指出銅鑼灣總統商場先係莎莎第一間店，今日一於講多少少莎莎嘅歷史。根據《福布斯》報道，莎莎創辦人郭少明夫婦70年代初喺荃灣眾安街一帶開始賣化妝品。後來郭太用2萬蚊頂咗銅鑼灣總統商場地庫一個面積40平方呎嘅專櫃嚟做，而呢個專櫃當時就叫做「莎莎」，呢個名就一直用到今時今日。

郭少明曾經講過，當年頂手之後，佢同太太都諗住幫專櫃改過第二個名，因為覺得上一手做到執笠，唔係咁吉利，但當時發現原來改名要俾1000蚊手續費，相當於專櫃嘅1個月租金，兩夫妻商量過後，決定擱置改名呢件事。後來郭少明發現「莎莎」呢個名唔單止繁體字、簡體字寫法一樣，中國十幾種方言「莎莎」嘅讀音都係一樣，覺得呢個名好好，於是就一直用到而家喇。

喺莎莎開業初期，條路一啲都唔易行，開業第1日只係做得32蚊生意。本身係公務員嘅郭少明身兼兩職，公餘時間負責採購商品同推銷產品。後嚟有一日，郭少明同太太去行超級市場，原先諗住買一件貨品，點知越揀越多，於是靈機一觸，就將莎莎嘅櫃枱改為自助式貨架，又俾啲折頭顧客，成功扭轉劣勢，生意額直線上升。

莎莎改變咗當時嘅購物模式，亦令化妝品變得大眾化，喺銅鑼灣總統商場地庫嘅專櫃開業幾年之後，莎莎生意越做越好，1985年仲租晒成個700呎地庫，而郭少明亦辭職，全身投入生意。到咗1989年，總統商場嘅業主突然大幅加租，於是郭少明把心一橫，將莎莎由地庫搬到去駱克道街鋪，成功轉危為機，將生額提升4倍。莎莎喺1997年响香港上市，超額認購500倍，利用資金開分店、拓展海內外市場，時至今日，莎莎已經有超過270間分店，遍佈香港、澳門、內地、新加坡同馬來西亞。

圖片取自官網。