原子彈有幾大威力?相信中學讀過歷史嘅史友都知道。繼美國、英國、法國同蘇聯後,中國喺60年代同樣成功研製核武。喺1964年10月16日,中國宣布喺當日下晝3點於新彊羅布泊成功試爆原子彈,成為全球第5個擁有並自行研製核武嘅國家。當時政府發表聲明,表示中國發展核武係為咗打破大國核壟斷、消滅核武器,又承諾唔會首先使用核武器,希望透過國際協商,促進全面禁止同徹底銷毀核武。聲明仲強調,喺呢一日嚟到之前,都會繼續研發核武,加強國防。

其實試爆成功嘅背後,唔少得蘇聯嘅幫助,佢哋有份提供設備、專家幫助、圖紙等資訊同技術,後來蘇聯專家於1959年撤走,令中國嘅研發開始靠自己。喺1964年10月,即係中國試爆原子彈之前,蘇聯領袖赫魯曉夫會晤日本外相藤山時,就已經提到「中國已經具備生產原子彈嘅能力」。第一次試爆原子彈之後,中國繼續進行試爆、提高研製核武嘅技術同能力。喺1967年6月17日,更加成功試爆氫彈,反映當年嘅科研技術同埋團隊已經達到高水平。

圖為1964年原子彈試爆,取自網絡。