秘書妹妹最近成日幫襯中醫，所以要响公司沖中藥飲，仲話自己「才」多身子弱，真係無佢咁好氣。講起中醫，電視台十幾年前都有套相關題材嘅時裝劇——2002年嘅《情牽百子櫃》。戲入面加咗唔少中醫、藥膳元素，當年嚟講係幾新鮮嘅題材。呢套戲另一個令觀眾留下深刻印象嘅，就係首主題曲《苦口良藥》，啲歌詞仲好配合主題添，好似「縱是病人捱到茶也變苦苦茶亦變甘」等，唔怪之得當年唱到街知巷聞喇。

講返劇情先，套劇嘅主角包括郭晉安、佘詩曼同吳美珩，三位演員所扮演嘅角色都有中醫背景。郭晉安飾演大藥行保和堂一名職員張二輝，佢爺爺係著名中醫張時生（胡楓飾演）。女角色方面，佘詩曼就飾演保和堂太子女吳倩如，因為唔想靠父幹，所以喺保和堂做一名小職員，期間認識咗郭晉安。唔使講兩個人之後梗係相戀，但遭到佘詩曼戲入面嘅爸爸捧打鴛鴦。另一方面，郭晉安為咗得到名醫姜鐵圖嘅中成藥代理權，學習中醫，巧合咁識咗姜鐵圖個女姜心悅（吳美珩飾演）。喺吳美珩幫助下，郭晉安就同父異母嘅細佬發展藥膳生意。既然講得出係三位主角，又點少得郭晉安、佘詩曼同吳美珩嘅三角戀？當中嘅轇轇轕轕當年睇到觀眾好入戲。

講到最尾，各位記唔記得首主題曲係許志安同邊位女星合唱？講少少貼士過大家，位女明星近年已經好少喺螢幕出現喇，打完段文，搞到阿史有少少掛住佢添~

劇照嚟自網絡。