喺18年前今日，美國發生911恐襲，19名阿蓋達恐怖份子騎劫4架客機，先後撞向紐約世貿中心雙子塔、美國國防部五角大樓西翼，最後一架客機就喺乘客同機組人員阻止下，沒有撞向重要建築，最後於賓夕法尼亞州田野墜毀，全機無人生還。阿史記得當年客機撞向世貿中心之後，大樓著火焚燒、冒出大量黑煙，有好多人選擇跳樓，場面仍然歷歷在目，令人心酸。恐襲導致近3000人死亡、超過6000人受傷。隨住時間過去，部分救人英雄嘅仔女已經長大，佢哋選擇投考消防，用行動向父母致敬。

恐襲嘅遺害相隔多年仍然未消散，由於世貿中心建築材料含有大約100噸石棉，世貿中心倒塌之後石棉四處飛散，損害現場救援人員、清理人員以及當地居民健康，有數萬人患癌或呼吸系統疾病、約2000人死亡。911恐襲後，美國國會就立法設立受害者賠償基金，今年7月總統特朗普就將基金嘅賠償期，由2020年延長至2092年，為受害者終生支付醫療費用。

與此同時，當年救援行動中有警察及消防為救人而殉職，部分人嘅兒女近年選擇投身消防行列，好似紐約急救訓練學校今年有新一批消防員畢業，其中13名有男有女嘅出班消防員，父母正正就係當年捨身救人嘅英雄。

原圖取自網絡。