睇返民國名人嘅情史,阿史發現唔少人仲保留住三妻四妾嘅封建傳統,而通常佢哋嘅原配都係屋企安排嘅。就好似著名作家魯迅咁,原配夫人朱安係母親逼佢娶嘅,魯迅雖然成日冷落原配,但朱安就毫無怨言,仲一直恪守婦道、照顧屋企。魯迅離世後,朱安仍關顧亡夫另一個老婆許廣平兩母子,叫佢哋搬過嚟同自己一齊住,互相照應。身為一個女人做到咁,究竟係愛屋及烏?賢淑爆燈?定太過傳統太過傻?

話說朱安年紀大過魯迅3年,無讀過書,係個好傳統嘅女性。魯迅母親一心想撮合魯迅同朱安,成日催個仔回國成親。魯迅唔肯,就一直拖延。結果喺1906年7月,周媽媽(魯迅真名周樹人)突然發電報俾魯迅話自己病重,希望魯迅儘快回國。魯迅不疑有他,即刻出發。點知,返到紹興嘅第二日,周媽媽就迅速舉辦婚禮,逼魯迅同朱安成婚。無辦法之下,魯迅唯有無奈娶咗朱安,但結婚幾日後,魯迅就離開屋企,去咗日本。

之後魯迅輾轉去過唔同地方教書,好少返屋企,只係得朱安留喺屋企照顧母親。兩夫妻聚少離多,始終相敬如賓,魯迅會俾家用朱安,等女方安排日常生活,煮飯、洗衫、補衫等。朱安仲會為魯迅鋪床、準備換洗衣服等,因為魯迅盡量唔想見到佢,所以朱安準備咗個大箱做洗衣籃,等魯迅不斷有衫替換。

連後嚟魯迅娶咗學生許廣平,朱安亦大方咁同許廣平姐妹相稱,可謂係一個稱職嘅夫人。魯迅亦會定期寄錢俾朱安娘家,朱安病咗又會陪佢睇醫生。直到魯迅病逝,個個都忙住整理、保護魯迅嘅遺物,無暇顧及朱安,朱安終於忍唔住出聲:「你們總說魯迅遺物要保存,我也是魯迅的遺物,你們也得保存我呀!」

圖為魯迅同朱安,原圖嚟自網絡。