尋日提到傳聞美國總統特朗普有意向中國追討1911年辛亥革命前所發行嘅國債——湖廣鐵路債券，用嚟做貿易戰嘅談判籌碼。講開債券嘅歷史，原嚟英國亦曾用袁世凱債券做談判籌碼，叫中國還錢，仲牽涉到香港問題談判？究竟係咩一回事？

講返咩係袁世凱債券先，話說喺1912同1913年，臨時大總統袁世凱面對政府債台高築嘅爛攤子，於是派親信向英、德、法、日、俄財團借錢，名義上係將清廷同包括匯豐銀行等外國銀行財團借落嘅錢，變為北洋政府嘅「善後大借款」，袁世凱當時獲得2500萬英鎊貸款，並對應相關金額，發行20同100英鎊面額嘅債券。北洋政府答應用鹽稅作為貸款擔保，並將班財團列為北洋政府借貸優先方。後嚟袁世凱於1916年逝世，中國陷入軍閥割據時代，國民政府喺三十年代開始停止支付債息。

以為段歷史咁就完？邊有咁易。八十年代初，英國已經向中國索賠清朝舊債，雙方為此談判多年。《彭博商業周刊》提到，喺1987年，時任英國首相戴卓爾夫人同前國家領導人鄧小平就香港問題談判，期間英方將一批英國投資者持有、袁世凱政府當年發行嘅債券當成籌碼談判。

最終點解決？中英兩國政府同年喺北京簽署《關於兩國歷史遺留的相互資產要求的協定》，連帶處理埋其他兩地資產爭拗嘅訴求，講明中國支付大約2300萬英鎊，而英國向中國支付380萬美元，終結兩國公民之間嘅任何歷史索償。換而言之，中國人再唔能夠向英方要求退還1949年前嘅存款，英國人都唔可以要求中國政府償還清朝債券同賠償不動產等。報道提到，中國當時咁做，亦係為咗可以往後喺國際市場舉債。

圖為袁世凱同1913年發行嘅債券，原圖嚟自網絡。