不經不覺，香港迪士尼樂園已經開業14年，喺2005年嘅今日，香港迪士尼樂園舉行開幕典禮，時任國家副主席曾慶紅、特首曾蔭權亦都有出席，慶祝中國第一座迪士尼樂園面世。喺開幕前一日，香港迪士尼透過贊助商、員工家屬等渠道派出1萬張門票，並進行開幕前最後一次總彩排。到咗開幕當日，迪士尼埸面非常墟冚，大約有1.6萬名遊客入場，連同3000多名來自世界各地媒體記者同嘉賓，估計有超過2萬人入場。

香港政府响1999年提出興建香港迪士尼樂園，並且接受迪士尼方面嘅條件，由港府負責施工建設，包括興建樂園、迪欣湖同港鐵迪士尼綫等等，並且投資32.5億港元，持有主題樂園公司57%，而迪士尼方面就投資24.5億，持有43%股權。連同開園前期嘅填海、基建，以及之後多次擴建，港府總投資額達324億元。時至今日，香港迪士尼嘅營運情況未如理想，今年2月嗰陣公布舊年業績，係自2015年起連續第4年虧蝕。有部分媒體報道，因為多年虧蝕，港府都無得分紅，反而迪士尼就仍然可以賺取專利權費同管理費，形容對港府「唔公平」。不過喺2016年，時任商務及經濟局局長蘇錦樑就話，政府對迪士尼嘅投資，所得經濟效益已經响2012年回本，加上迪士尼屬於宏觀投資，樂園嘅設立亦對香港整體有經濟貢獻。

圖為香港迪士尼開幕慶典，取自網絡。