早輪《延禧攻略》興起,帶起一股追睇清宮劇嘅熱潮,令大家對滿洲貴族姓氏葉赫那拉氏、鈕祜祿氏、瓜爾佳氏等多咗認識。事實上,清政府雖然已經被推翻,但滿族八旗貴族嘅後裔依然真實存在,而且仲離我哋好近添。唔少報道都提到,演員周海媚、關之琳、惠英紅、吳京等都流有滿人血統,仲話部分人返去古代,分分鐘係妃子/格格添?

喺新版《倚天屠龍記》扮演滅絕師太嘅周海媚,同佢1994年飾演周芷若嗰陣無乜大變化,堪稱凍齡美人。周海媚曾經提過,佢嘅祖先曾經喺廣州做過五品官,當時幾乎成個廣東都歸佢家族所管,認真犀利。佢嘅祖先係女真族嘅瓜爾佳氏,清朝康熙同嘉慶等朝代,都有後宮妃嬪出自呢嗰姓氏,所以周海媚曾經講笑話,佢返去古代嘅話,好可能會成為妃嬪。其實瓜爾佳氏嘅後人邊止咁少,大美人關之琳亦係其中一份子,佢家鄉瀋陽嘅滿族聯誼會仲話關之琳係位格格添。據悉,佢嘅族人宜家多喺東北一帶生活,風光依舊。

瓜爾佳氏一族出名多美人,不過講到身份顯赫,葉赫那拉氏尤勝一籌,歷史上有名嘅慈禧太后就係出自葉赫那拉氏。奪得3屆金像獎影后嘅惠英紅同埋內地著名歌手那英都係葉赫那拉氏後裔,係名副其實嘅貴族之後。仲有烏雅氏後裔、武打明星吳京,以及鈕祜祿氏後人、著名鋼琴演奏家郎朗等紅人明星亦係滿族後代,如果佢哋生於清朝,分分鐘係貴族。

圖為周海媚同關之琳,原圖嚟自網絡。