作為傳媒人，就要不畏強權，如實報道真相，而呢兩點，民國《京報》嘅創辦人邵飄萍就做到咗。邵飄萍用佢嘅一支妙筆，反對中華民國大總統袁世凱稱帝、批判皖系軍閥首領段祺瑞政府屠殺愛國群眾、譴責奉系軍閥首領張作霖親日賣國，為此邵飄萍亦多次身陷險境，最後被張作霖設局殺害。

當初袁世凱稱帝之舉，徹底激怒咗嚮往民主、共和嘅國人，一時間天怒人怨。上海新聞界群情洶湧，決定請邵飄萍回國，口誅筆伐袁世凱。邵飄萍當然不負眾望，以一篇評論文章《預吊登極》，狠狠咁批評袁世凱稱帝面對各處反對聲音，更成為國家嘅劫數。呢篇文章簡直係振聾發聵，時人大呼解恨、過癮，更盛讚邵飄萍係「文字魔術師」。其後，邵飄萍又因屢次寫文章反對袁世凱，包括將近代民主革命家宋教仁被殺嘅元兇線索指向袁世凱、揭露袁世凱有意同日本簽訂《二十一條》等，導致「被捕三次，下獄九月」，邵飄萍亦因此獲得新聞界「頭號角鬥士」嘅美譽。

1918年，邵飄萍辭去《申報》駐北京特派記者一職，辦咗《京報》。袁世凱死咗之後，段祺瑞擔任國務總理。第一次世界大戰期間，北洋政府就住應參戰定保持中立嘅問題遲遲未有結論。邵飄萍用計入國務院見到段祺瑞，以自己身家性命擔保佢哋嘅對話三日內絕對唔會喺北京度走漏風聲，氹段祺瑞講出北洋政府將參加協約國對同盟國作戰嘅決定同細節。結果邵飄萍真係信守承諾，無將同段祺瑞嘅對話洩露，而係喺上海灘發佈《段內閣前途黯淡》（的確無喺北京走漏風聲），真係激到段祺瑞飛起。

講到呢度，其實邵飄萍同段祺瑞嘅恩怨仲未完㗎，想知道邵飄萍之後仲點同段祺瑞、張作霖鬥智鬥力？下次再講。

圖為邵飄萍、袁世凱、段祺瑞，原圖嚟自網絡。