近排睇新聞話,香港大學一隊考古團隊喺啱啱過去嘅暑假裡面,去咗亞美尼亞度做考古研究。佢哋更加喺亞拉臘平原東南部挖出有成3000年歷史嘅巨大儲物甕、動物骸骨同古城牆遺迹,可以話係考古學上嘅一大發現。

港大團隊主要喺亞美尼亞一個叫做Vedi嘅城堡遺址度重點考察,城堡嘅歷史可追溯到晚青銅器時代至鐵器時代,即係大概公元前1500至500年咁耐。呢個遺址保存咗一大幅4米高嘅護城牆,城牆中間有個長方形塔樓式嘅建築,用嚟作防禦同攻擊之用。

講起亞美尼亞,除咗係宜家「一帶一路」嘅沿線國家之一外,仲係古代絲綢之路其中一個重要嘅運輸樞紐。亞美尼亞嘅歷史可以追溯到2500年前,喺公元前95年至前65年間,亞美尼亞曾經係當時西亞最強大嘅國家之一,疆域由宜家嘅里海、地中海一帶一直去到埃及。13世紀以後,亞美尼亞嘅移民先後喺中國廣州、哈爾濱等地建立社區、教堂同埋商行,從事工匠、醫生、建築師等職業。

圖為Vedi城堡遺址航拍照同團隊考古相,原圖嚟自香港大學。