喺民國以前,男人三妻四妾好常見,連戊戌變法發起人、同弟子梁啟超一齊提出「一夫一妻一世界」運動嘅康有為,自己都唔係從一而終,反而娶完一個又一個。康有為嘅妻妾入面唔止得中國人,仲包括日本少女市岡鶴子。

康有為之所以發起戊戌變法,靈感源自日本嘅明治維新,亦因此佢對日本有所認識,仲喺風景如畫嘅神戶須磨「奮豫園」住咗一段日子。搬去奮豫園之後,適逢康有為第三位太太何旃理懷孕,朋友就介紹咗16歲嘅鶴子做傭人,幫手打理家頭細務咁。康有為同鶴子日對夜對,卒之都日久生情,何旃理就提議納咗鶴子做第四妾,一齊回國。

回國後,鶴子同康有為亦過咗一段比較甜蜜嘅生活,可惜隨住康有為第五妾入門,兩人相處嘅時光更少。有一次,上海有排發起抵制日貨運動,為此鶴子忍受咗唔少冷嘲熱諷,更加小心翼翼過日子。好難得鶴子終於懷孕,但當時康有為已經60幾歲,唔少人都懷疑鶴子嘅骨肉唔係康有為親生,而係同康有為長子私通所得。家庭紛爭搞到鶴子最後頂唔順,提出返日本探親嘅要求,最後喺日本生咗個女。翌年,康有為喺青島猝死,令鶴子痛不欲生。

圖為著名畫家徐悲鴻所畫嘅康有為六十行樂圖,原圖嚟自網絡。