出年就係東京奧運,但最近就有新聞就話東京奧組委准許喺奧運會上使用旭日旗,引嚟南韓不滿。南韓當局已經致函國際奧委會要求禁止使用旭日旗,並形容旭日旗係自19世紀末以嚟,日本帝國主義對亞洲侵略戰爭嘅象徵。而日本內閣官房長官菅義偉較早前就重申,掛旭日旗唔係政治宣傳,今日就等阿史講吓旭日旗嘅歷史喇。

旭日旗係由日本國旗「日之丸」衍生出嚟嘅,日之丸有另一個名叫「日章旗」,意思係太陽標記嘅旗幟,喺日本信奉嘅神道之中,日本皇室嘅祖先天照大神就係太陽嘅神格化。日之丸喺8世紀開始使用,也有「天皇旗」之稱,係天皇嘅旗號,以及朝廷所頒發嘅軍旗。到咗1858年,日本同美、荷、俄、英、法等五國簽署《安政條約》之後,日本正式開國,並以日之丸作為日本嘅象徵、日本商船嘅標誌。

講返旭日旗先,响1870年明治政府頒布《太政官布告》,以帶有16條紅色放射光綫嘅旭日旗作為陸軍軍旗,目的係為咗同幕府軍劃清界線。到咗1889年,日本政府頒布《海軍旗章條例》,規定旭日較為偏左嘅旭日旗作為海軍軍旗。至於旭日旗16條紅色放射光綫,「16」呢個數其實係取自天皇家徽嘅16瓣菊花圖案。

之後嘅事相信大家都有所認知,日軍喺二戰時期侵略亞洲其他國家,期間就係掛住旭日旗,轟炸、屠殺無數平民。日本喺二戰投降之後,美軍一系列去軍事化同民主化措施,包括禁止使用日章旗、旭日旗,同禁止「君之代」呢首歌。禁令去到1950年取消,日本國內嘅學校、家庭、政府機關開始掛日章旗、唱君之代,而1954年開始日本自衛隊亦都開始掛旭日旗。相對之下,德國納粹卐字旗喺二戰之後就已經被禁止,逐漸改善同二戰受害國家嘅關係。

圖片為南韓人撕毀旭日旗,取自網絡。