阿史屋企附近有一條又長又斜嘅斜路，次次都行到索曬氣，啲親戚都會叫佢做「長命斜」，但原來「長命斜」呢個名都有段故㗎喎，阿史今次就介紹吓喇！其實以前好多人都會叫中環嘅奧卑利街做「長命斜」，原因唔係因為佢特別長、特別斜，而係同域多利監獄、囚犯嘅命運以及壽命有關嘅。

話說响殖民地年代，域多利監獄就有分近亞畢諾道同奧卑利街兩邊，由於當時死刑係响近住亞畢諾道嘅裁判司署廣場執行，所以啲死囚都會收押喺亞畢諾道嗰邊嘅監獄，相反收押喺奧卑利街嗰邊監獄嘅犯人都比較「長命」，佢哋獲釋或者家人探監都會經奧卑利街呢條路，於是奧卑利街就有咗「長命斜」呢個花名喇。

有另一個講法就話，就係話當時有好多囚犯經奧卑利街呢邊逃獄，佢哋認為呢條通道可以令壽命「延長」，所以叫條路做「長命斜」。

圖為奧卑利街，取自網絡。