以前細個搭車經過九龍黃大仙嘅竹園道、竹園邨嘅時候，都會諗呢個地方係咪好多竹嘅呢？阿史當時就梗係見唔到有竹喇，不過原來以前竹園道附近一帶係真係有竹㗎，今次就介紹吓呢區嘅歷史先。

竹園道係竹園區內一條主要道路，而竹園原本係一條歷史非常悠久嘅鄉村。根據華南研究會嘅資料，嗰度有一批林氏村民生活咗幾百年，基本上全部人都姓林，而蒲崗村林氏亦都係由竹園村林氏分支出嚟嘅。至於點解叫「竹園」，據講係因為呢一帶周圍都係竹樹，所以初時建村嗰陣，條村就好似被一個竹園包圍住咁，於是就叫做「竹園」喇。

英國政府同清廷於1898年簽署《展拓香港界址專條》之後，開始整理界限街以北到新界嘅土地，劃分開新界同新九龍，而竹園就成為九龍嘅一部分。到咗20年代，有唔少富商嚟竹園買地起別墅，貪呢度附近有竹林又有溪澗。而林氏村民亦開始利用自己嘅土地做生意，當中包括沙河粉廠，1933年村入面就有3間廠整沙河粉。講到呢度，搞到阿史想食飯碗沙河粉添~

圖為竹園道，取自網絡。