今日係9月18日，亦係「九一八事變」88週年。九一八事變發生响1931年9月18日，當時日本關東軍於瀋陽北郊柳條湖附近南滿鐵路嘅一段路軌埋下炸藥，炸毀鐵路，然後就誣蔑係中國軍隊所為，並且向中國東北軍駐地嘅北大營同瀋陽進攻，揭開日本三十年代侵華序幕，史稱「九一八事變」。

領導嘅東北軍張學良當時採取不抵抗政策，於是遼寧省政府、兵工廠、機場等重要設施隨即被佔領，令日軍於9月18日當晚至第二朝期間，迅速奪取北大營同瀋陽。同年年底，日軍掌控成個東北，翌年3月喺東北扶植成立傀儡政權偽滿州國，透過呢個傀儡政權喺東北實行殖民統治。

2014年9月，張學良口述歷史《張學良口述歷史（訪談實錄）》提到，佢晚年承認「不抵抗命令是我下的」。至於張學良點解咁做？有學者分析，張學良當時唔知道日本人嘅陰謀，以為件事係對方打鬧嘅騷擾性質，企圖製造麻煩，張學良自稱當年係對日本嘅行為有「判斷失誤」。

近年內地開始將抗戰歷史嘅開端，由1937年「七七事變」推前到1931年「九一八事變」。內地檔案館編研處處長王梓熠指出，日本早喺1905年就以保護南滿鐵路為由，派軍隊駐守沿線，又設警察機關派駐日本警察，截至1930年年底，日本喺瀋陽非法設置咗14個警察機關、派駐17個日本警察。有史料記載，呢啲日本警察會喺當地進行收集情報活動，包括調查武裝部隊數目同武器細節等等，1931年8月又曾經殺害瀋陽居民，可以話日本早就已經喺東北侵犯中國嘅主權。唔知大家又點睇？

原圖取自網絡。