馬會尋日因為安全問題，取消咗尋晚跑馬地馬場嘅賽事，搞到唔少馬迷失望，相信如果而家仲有馬票（粵音讀「馬標」），就會令更多「發橫財夢」嘅人失望喇。馬票係香港早年一種結合抽獎同賽馬嘅博彩方式，當時馬會就會响售出嘅馬票入面抽出入圍號碼，然後將號碼編配俾一批馬，之後喺賽事入面跑第一嗰匹馬嘅相應號碼就係頭獎號碼、跑第二就係二獎、跑第三就係三獎，其他入圍嘅馬票亦都有獎。馬票頭獎獎金由初期幾十萬，逐漸增加至超過100萬，根據馬會資料，喺50年代筆錢可以買到幾十層洋樓，顯示啲獎金幾咁有吸引力！

而家周圍都係投注站，又有得電話投注、網上投注，買六合彩非常方便，不過以前就唔同喇，得幾個正式馬票發售處，包括德輔道中交易行（而家嘅置地廣場）、皇后行（而家嘅文華酒店）、德己立街五號、彌敦道382號等等，當時吸引唔少人購買。喺四十年代尾，開始有人喺街上兜售馬票，每張賺一兩毫，後來就轉去茶樓兜售，逐漸越來越多人都以賣馬票做「兼職」。

圖為賣馬票情景，取自網絡。