喺1898年6月11日，光緒帝頒佈《明定國是詔》，為戊戌變法揭開序幕，但到咗9月21日慈禧太后發動政變，將光緒軟禁，又大肆搜捕維新派官員，令戊戌變法只係維持咗103日就宣告失敗。維新派嘅代表康有為早喺政變發生之前一日就已經離開北京去到上海，並且由英國人保護下逃到香港，而另一位代表梁啟超就喺日本人嘅幫助下，由天津逃到日本。而譚嗣同、楊銳、林旭、劉光第、康廣仁、楊深秀等六位維新派人士，就遭到處死，史稱佢哋六個為「戊戌六君子」。

响呢次政變之中，負責訓練新軍袁世凱發揮關鍵作用，原先維新派諗住拉攏袁世凱，希望佢出兵殺死慈禧寵臣榮祿、包圍頤和園。但點知慈禧率先發動政變，軟禁光緒同搜捕維新派官員。一般講就係話袁世凱當時向榮祿告密，再由榮祿轉述俾慈禧太后知，有另一個講法就係話袁世凱係收到慈禧即將發動政變嘅消息之後，即刻將維新派嘅計劃和盤托出，同維新派「劃清界線」。但無論點都好，袁世凱經歷呢件事之後，得以扶搖直上。

圖為慈禧、袁世凱，取自網絡。