睇古裝劇啲人犯下嚴重罪行,被誅九族大家就聽得多喇,唔知誅十族大家又有無聽過呢?無錯,明朝真係有過史上唯一一單誅十族嘅案例,就係明成祖朱棣將著名學者方孝孺滿族誅殺嘅悲劇。點解嬲到要誅十族?其實係同方孝孺駁嘴鬧皇帝有關。

想當初朱棣仲係燕王嘅時候,發動靖難之變,攻陷南京,當時方孝孺已經係四海稱頌、名滿天下嘅大儒。但佢效忠嘅係建文帝、朱棣侄仔朱允炆,所以當朱棣想要方孝孺好似周公輔助周成王咁輔佐自己,並且起草詔書嘅時候,方孝孺打死都唔肯屈服。朱棣唔信邪,覺得方孝孺唔怕死啫,斷估都驚連累屋企人啩?於是就威脅方孝孺,再唔從命就誅佢九族,所謂誅九族包括自己屋企人、姑姑同佢個仔、姐妹同佢哋個仔、自己個女同佢個仔、外祖父一家、外祖母娘家、阿姨同佢個仔、岳父一家同岳母娘家。

點知方孝孺真係唔驚,居然寫低「燕賊篡位」幾隻字,仲駁多句嘴話,算誅佢十族都唔會屈服。今次大鑊喇,朱棣被佢激到震,真係誅咗方孝孺十族,第十族就係連佢啲學生都唔放過,而方孝孺本人亦被淩遲處死。

圖為《洪武三十二》劇照同方孝孺畫像,原圖嚟自網絡。