上次講起油麻地新填地街，有史友就話唔少地方都係填海填返嚟，今次就介紹其他填出嚟嘅市區喇。特首今晚會去灣仔伊利沙伯體育館同市民對話，今次不如就講吓灣仔歷史喇。唔講唔知，原來灣仔市中心一帶都係填返嚟㗎。

早喺1850年代，灣仔寶靈城（即係鵝頸一帶）建成。但當時灣仔一直受制於域多利軍營嘅樽頸地帶，令灣仔通往中環嘅交通非常之唔方便，於是喺1870年代初，時任港督堅尼地諗住响軍營上面興建堅尼地道，向東發展。點知1880年代地價急跌，令計劃停咗落嚟。咁當時咩人住灣仔？變成日本人同歐洲人為主。

到咗1900年代初，港英政府決定喺灣仔一帶填海。1921年工程動工，最終耗資540幾萬元，响1929年完成，填出36公頃土地，用作興建條件較佳嘅樓宇，以及較寬闊嘅街道，從而疏導港島嘅交通，大家熟悉嘅軒尼詩道、駱克道、告士打道同謝斐道等等，仲有修頓球場，都係嗰陣時填完海先有位置興建。

除咗疏導交通，灣仔填海填返嚟嘅土地亦都興建咗大量房屋，當時就有好多因為內地局勢動盪來港嘅居民帶埋資金，嚟到灣仔居住同置業，令嗰區得以漸漸蓬勃發展。

圖為1880年代灣仔，取自網絡。