哥哥張國榮以前拍過好多電影,古裝嘅都有唔少,好似《白髮魔女傳》咁,就係經典之一。《白髮魔女傳》係武俠小說作家梁羽生50年代嘅作品,1993年由導演于仁泰執導同改編,由張國榮同林青霞飾演主角卓一航同練霓裳。

《白髮魔女傳》入面嘅卓一航多情不羈,佢本身係武當派弟子,細個嗰陣曾經被狼女、屬於魔教一員嘅練霓裳救過,多年之後二人相遇,並且互生情愫,卓一航發過誓話一生都會相信練霓裳。但無幾耐,卓一航就誤會練霓裳係血洗武當嘅元兇,練霓裳好傷心,之後就變成白髮魔女。卓一航後來知道自己誤會咗練霓裳,但就已經恨錯難返,抱憾終生。

套戲除咗哥哥同青霞,仲有唔少演員都做得好好,好似單戀卓一航嘅師姐何綠華(藍潔瑛飾演),以及性格扭曲嘅姬無雙(吳鎮宇、呂少玲飾演)。姬無雙特別嘅地方,在於佢嘅與眾不同——原著同之後版本嘅《白髮魔女傳》都無呢個角色。响電影入面,嗜殺成性嘅姬無雙係一對連體嬰,因為背脊連埋一齊,令兩姐弟連瞓覺都要背對背咁打側瞓。最後卓一航用刀將佢哋一分為二,兩姐弟終於真正見到對方。吳鎮宇嘅對白,「原來咁樣瞓好舒服」,將詭異、愛得盲目嘅角色性格完美演繹,令觀眾留低深刻印象。

圖為劇照,取自網絡。