今日係建國70週年，當中嘅大型閱兵儀式可以話係亮點之一。而70年前嘅開國大典之中，北京亦舉行一場盛大閱兵儀式，有成30萬軍民當日下晝聚集喺天安門廣場參加。喺毛澤東主席宣布中華人民共和國中央人民政府成立，以及宣讀《中華人民共和國中央人民政府公告》之後，天安門廣場就舉行閱兵儀式，海陸空三軍超過1.6萬人受閱。唔講唔知，原來當時參加嘅戰機係裝咗實彈，喺閱兵史上相當少見，亦反映當時局勢。

事緣係响開國大典舉行嗰陣，中國東南、華南、西南等地區仍然被國民黨佔領，當時北京仍然有一定風險，所以當時有4架戰機就裝住實彈受閱，同時兼顧防空任務。除咗戰機之外，呢次閱兵亦出動119門火炮、152架坦克同裝甲車、222架汽車，以及2344匹軍馬等，場面盛大。

除此之外，當局都曾經考慮過喺市郊西苑機場舉行閱兵，因為西苑機場夠空曠，一旦遭到國民黨空軍襲擊，亦都容易疏散同隱藏，但西苑機場嗰邊要如果搭建看台，會係個好大嘅工程，而且不及天安門城樓景觀咁好，又離市區太遠，唔方便群眾參與，所以最後都係揀天安門廣場舉行，自此咁多年嘅國慶閱兵亦都喺天門安廣場舉行。

圖為開國大典閱兵儀式，取自網絡。