上個禮拜北京大興國際機場正式啟用，未來即將成為國內外航線嘅重要航空樞紐。不過隨住大興機場正式投入營運，北京南苑機場會正式關閉。講起南苑機場，佢唔單止係中國史上第一個機場，亦係第一個軍用同埋民用機場，喺中國航空史上佔有重要地位。

位於北京豐台區嘅南苑機場喺1910年8月建成，至今已經有成109年歷史，宜家係軍民合用機場。早喺南苑機場未起之前，就有嚟自法國嘅兩架飛機喺南苑做飛行表演，呢次表演亦係首次有飛機喺中國起降。之後，清政府將南苑練兵場嘅其中一塊地改成飛機跑道，南苑機場由此誕生。

1948年12月，南苑機場成為解放軍空軍喺北京嘅一個軍用飛機場。翌年8月，解放軍第一個飛行中隊喺南苑機場成立，之後仲執行「開國大典」閱兵儀式嘅飛行任務。自此之後，南苑機場一直係空、地受閲部隊嘅訓練基地，係亞洲第一間航空學校，同時亦係中國第一個航空工廠。蘇聯最高蘇維埃訪問團、美國國務卿基辛格等重要人物嘅專機亦曾喺南苑機場降落，顯示南苑機場極具歷史意義。

上個星期三夜晚11點，南苑機場嘅民航部分送走最後一架客機，翌日正式關閉。據北京市政府規劃，原本喺南苑機場嘅所有民航航班同軍用航空設施裝備可能會全部轉移去大興國際機場，而南苑機場亦將會拆除，部分設備有機會改建成航空博物館。

圖為五十年代飛機「首都一號」喺南苑機場試飛情景，原圖嚟自網絡。