近排同位中同食飯，佢提到前排去咗熱門旅遊地曼谷，仲講起已故泰王普密蓬嘅事跡。其實普密蓬有兩個女一個仔，仔仔就係現任泰王哇集拉隆功，令外兩個囡就係年頭被取消參選資格嘅大家姐烏汶叻公主同埋「中國通」兼細妹詩琳通公主。講起詩琳通，佢1981年5月首次訪問中國，成為泰國第一個訪華嘅王室成員。其實佢本身對中國歷史同文化都好有興趣，好學程度絕對唔比大家輸蝕。

詩琳通公主嘅學歷絕對見得人，佢1973年於朱拉隆功大學人文學院讀歷史、泰語及東方語言，1981年獲得東方語言碩士學位，1986年再攞埋教育學博士學位，真係要寫個服字。

除咗學歷誇啦啦之外，佢對中國歷史同文化都好有興趣，唔單止講得一口流利中文，仲鍾意睇《三國演義》等古典名著，又擅長中國書畫，連二胡、古箏等樂器演奏都無問題，認真有才華。為咗學習上更進一步，詩琳通先後跟過中國大使館選派嘅9位資深中文教師，學習漢語拼音、普通話同中文字。除咗中文，佢仲精通英文、法語、高棉文、巴利文等多種語言。

詩琳通於泰國積極參與公益事業，好受泰國民眾歡迎。佢曾經出書向泰國人民介紹中國，對眾泰文化交流有唔少貢獻。

圖片嚟自網絡。