話說早排有老友返咗內地旅行，佢食咗一種叫做biangbiang麵嘅菜式，覺得好好食，影咗張相sd俾阿史，仲問阿史識唔識寫個「biang」字。阿史梗係識喇，仲食過添，只不過真係打唔到出嚟，唯有上圖俾大家睇。

「biang」讀普通話第二聲，有成56劃咁多，堪稱係史上最難寫嘅漢字，不過就暫時未收入正規字典入面。咁多筆劃，點記？原嚟有個口訣：一點撩上天，黃河兩道灣，八字大張口，言字往裡走；你一扭，我一扭；你一長，我一長；當中夾個馬大王，心字底，月字旁，留個勾搭掛麻糖，推個車車逛咸陽。

呢個「biang」字源於陝西特色麵條biangbiang麵，款麵好似條腰帶咁寬，既可以薄如蟬翼，又可以硬得有口感。講起呢個字嘅來歷亦眾說紛紜，相傳係秦始皇食過之後好鍾意，特登賜字以示珍貴；亦有說法話係從前有個窮書生，食完霸王餐之後跪求以字代錢，跟住創作而成；仲有人話「biang」係模擬整麵過程所發出嘅聲音。點都好喇，麵好食就得，唔知有無人食過呢？

圖為「biang」字同biangbiang麵，原圖嚟自網絡。