宜家好多女士都事業有成，叻過唔少男士，更加有女士優秀得滯寧願一直單身唔嫁人，其實呢種現象早喺民國已經有先例。被譽為係「近三百年來最後一位女詞人」嘅呂碧城，曾係《大公報》主筆、做過女校長同袁世凱秘書，但就終身未嫁。一方面原因固然係因為佢太優秀，眼光比較高，另一個原因同佢少年時期被退婚嘅遭遇有關。

呂碧城12歲嗰陣已經有好高嘅詩詞書畫造詣，仲有個鄉紳之後做未婚夫。可惜佢13歲嗰年屋企發生巨變，父親病逝，佢哋嘅家産被族人霸佔，母親更被禁錮。呂碧城唯有寫信俾父親嘅朋友、學生求助，雖然母親最後得以救出，但夫家嗰邊見到呂碧城年紀小小就咁犀利，日後恐怕難以管教，於是退咗婚。女仔被退婚喺嗰個年代係奇恥大辱，呢件事亦對呂碧城造成一定嘅心理陰影。

不過，呂碧城嘅遭遇並唔影響佢嘅事業發展，佢隨後被《大公報》總經理賞識，擔任主筆，成為中國史上第一個女編輯。正所謂「窈窕淑女，君子好逑」，追求呂碧城嘅男人好多，當中包括大總統袁世凱之子袁寒雲、晚清重臣李鴻章之子李經羲等，不過呂碧城通通睇唔上眼，佢只係睇中咗戊戌變法發起人梁啟超同埋國民黨首領汪精衛。但呂碧城嫌梁啟超有家室、年紀太大（大佢9歲)，汪精衛年紀又太細（同佢同年）。於是，呂碧城唯有寄情事業，興辦女學、推動女子教學，後嚟仲做埋袁世凱嘅女秘書。不過，由於不齒袁世凱稱帝，呂碧城辭去職務，去歐美遊歷。1939年，二戰爆發後，呂碧城嚟到香港，4年後於九龍逝世。

原圖嚟自網絡。