諾貝爾文學獎得主今晚揭盅，相信各位史友都有心水人選。唔講唔知，原來二戰時嘅英國首相邱吉爾都曾經喺1953年憑住《第二次世界大戰回憶錄》，擊敗當年嘅大熱門作家海明威，贏得文學獎。

邱吉爾雖然大半生都係從政，但佢自小就已經培養寫作嘅習慣。佢21歲响赫斯特皇家軍事學院畢業之後，曾經做過隨軍記者，採訪古巴革命，自此佢就鍾意咗寫作。之後邱吉爾隨所屬嘅騎兵團喺印度南部駐防，佢就做埋兼職戰地記者，完成著作《馬拉坎德野戰軍紀實》。

出任首相期間，邱吉爾好希望可以寫一部二戰回憶錄，於是就將工作期間嘅所見所聞記錄低，又保留大量同美國總統羅斯福、杜魯門，以及蘇聯領導人史達林嘅信，呢啲文獻同資料就成為佢寫回憶錄嘅重要素材。喺1945年，同盟國戰勝德國之後，邱吉爾所屬嘅保守黨喺大選之中落敗，失去首相之位，但佢就趁呢個機會完成《第二次世界大戰回憶錄》呢本鉅著。邱吉爾喺1951年再度出任首相，之後1953年獲得諾貝爾文學獎，但可惜嘅係邱吉爾並沒有親自去瑞典領獎。

當時因為史達林去世，身為英國首相嘅邱吉爾必須出席會議，結果只能由佢太太同女兒代為出席領獎。負責評審同頒發諾貝爾文學獎嘅瑞典文學院對邱吉爾亦不乏讚美之詞，院士利列斯特蘭德就話，邱吉爾嘅言語同行動，喺黑暗時代喚起世界各地千百萬人心中嘅信念同希望；瑞典文學院另一位院士齊凡爾茨就話，文學獎本來係將榮譽給予作者，但今次就係作者給予榮譽文學獎。

原圖取自網絡。