諾貝爾和平獎今日公佈得獎者，16歲瑞典少女通貝里致力推動環保，成為今年大熱人選，但有人指通貝里嘅言行太過火爆、偏激，若佢得獎將會引起巨大爭議。回顧以往嘅和平獎得獎者，美國前任總統奧巴馬同緬甸國務資政昂山素姬亦曾惹起爭議。不過講到最令人O嘴嘅，莫過於納粹領袖希特拉曾經獲得和平獎提名？

同戰爭、種族滅絕等劃上等號嘅希特拉，1939年曾經獲得和平獎提名，當時二戰尚未爆發，英國首相張伯倫因為前一年促成《慕尼黑協定》簽署，獲瑞典議員提名佢角逐和平獎。咁關希特拉咩事？原來瑞典其中一位國會議員唔滿意張伯倫獲得提名，於是提名希特拉，諗住用嚟諷刺其他提名張伯倫嘅議員，不過搞搞吓最後都係要撤回提名。

去到現代，上任唔夠一年嘅奧巴馬於2009年獲得和平獎，表揚佢加強國際合作，令唔少人嘩然，因為大家都唔知奧巴馬究竟做咗啲咩大事可以獲獎，唔通純粹係因為佢係美國史上第一位黑人總統？連奧巴馬自己都成頭問號，「我唔覺得自己應該獲獎。」喺同年底，美國派去駐守阿富汗嘅士兵人數就增加咗兩倍，甚至出動無人機轟炸恐怖分子，唔少民眾無辜喪命，令外界加深對佢獲獎嘅質疑。

至於昂山素姬，佢曾為緬甸人民爭取自由，先後被軍政府軟禁，係全球聞名嘅人權鬥士，佢喺1991年獲獎實至名歸。可惜，喺佢近年擔任國務資政期間，漠視羅興亞人危機，對緬甸軍方嘅暴行無動於衷，與過往形象相去甚遠。有人指責佢無為羅興亞人嘅平等權利發聲，坊間更有聲音，要求褫奪昂山嘅和平獎。佢前年接受BBC訪問，被問到會唔會覺得西方傳媒將佢同德蘭修女、甘地相比，其實係誤解咗佢，因為昂山更似戴卓爾夫人？昂山嘅答案非常值得深思，佢話自己唔係德蘭修女同戴卓爾夫人，「我只係一個政客」。

原圖嚟自網絡。