最近有新聞話，近年陸續失去邦交國嘅台灣，諗住喺美國屬地關島重新設立辦事處，希望維繫同美國嘅軍事關係。台灣同關島嘅關係可以追溯返去1973年，當年台北同關島成為姐妹市，台灣人甚至享有關島免簽證待遇，之後台灣外交部喺2017年因為預算問題，先關閉當地嘅辦事處。其實好多時提起度假勝地關島，都會同軍事扯上關係，島上一共有兩座軍事基地，分別係北部嘅空軍基地同南部嘅海軍基地，美軍仲部署唔少軍備同士兵，到底關島本身有咩重要性？

話說喺1521年，葡萄牙探險家麥哲倫喺環航地球嘅時候，發現咗關島呢個地方。到咗1565年，西班牙佔據關島，喺島上推行基督教信仰同西班牙生活文化，直至1898年美國贏得美西戰爭，自此關島就由美國海軍管治。第二次世界大戰期間，日軍偷襲珍珠港，無幾耐就侵佔關島，令關島成為戰時唯一被日軍佔領嘅美國領土，直至1944年美軍重奪關島為止。

二戰之後，因為關島嘅地理位置有助美軍掌握亞太地區舉動，戰機同飛彈範圍可以涵蓋南韓首爾、日本東京以及台北，有幾重要真係唔使多講。越戰嗰陣，美軍曾經用關島收留超過10萬名越南難民，又喺關島派出超過155架轟炸機空襲越南、老撾等地。除咗轟炸機，目前美軍亦喺關島部署芝加哥號、俄克拉荷馬號等4艘核潛艇，共有約7000名美軍駐守。

圖為關島美軍基地，取自網絡。