喺2001年今日，有「少帥」之稱嘅張學良喺美國夏威夷逝世，享年100歲。張學良喺1936年西安事變中，同西北軍將領楊虎城軟禁蔣介石，要求停止剿共一致抗日，促成國共兩黨第二次合作。之後佢被蔣介石同蔣經國軟禁超過半世紀，直至蔣經國逝世、李登輝繼任總統之後，响1990年解除禁令，恢復張學良自由。經過多年軟禁生涯，張學良最想嘅就係回到大陸，一解思鄉之情，但最終因為李登輝嘅緣故，一直未能成行。

喺1991年嘅農曆新年前，張學良聯絡爸爸張作霖總參謀個仔、曾任美國喬治城大學歷史系教授王冀，表達想訪問大陸嘅諗法。當時張學良憂慮，一解禁就提出想去大陸，會令李登輝唔開心，於是就諗住等到事成之後先至同佢講。張學良就託王冀去大陸同有關部門溝通，希望得到大陸方面領導人嘅邀請。

點知有一日李登輝請張學良去總統府，當時隻手拎住時任國家主席楊尚昆嘅邀請函，好嚴肅咁責問張學良點解要搞呢一套，又話自己咁信任張學良，點解對方仲要咁做。搞成咁，張學良覺得好難為情，於是申請去美國生活，直至2001年逝世。

圖為張學良同夫人趙一荻，取自網絡。