有南京版《清明上河圖》之稱、由明代畫家仇英繪製嘅《南都繁會圖》，近排被專家放大500倍之後，發現入面竟然有一個戴住眼鏡嘅男人！原嚟早喺明朝已經出現眼鏡？乜眼鏡唔係1784年（清乾隆年間）由美國發明家富蘭克林發明嘅咩？咁又唔係喔，富蘭克林係世上第一個發明同時適用於矯正遠視同近視嘅雙光鏡片，而唔係發明眼鏡。

《南都繁會圖》描繪嘅係明朝舊都南京嘅市井繁榮景象，屬於國家一級保護文物。雖然幅畫嘅具體創作時間難以確定，但根據仇英本人嘅生平推算，呢幅畫至今大概有500年歷史。由於年代久遠，《南都繁會圖》表面多處出現模糊、毀損嘅情況，為咗妥善保護呢幅畫，之前一直被收藏喺國家博物館入面。

其實明朝有人戴眼鏡一啲都唔出奇，南宋作家趙希鵠就曾喺《洞天清錄》提到：「靉靆（音藹代），老人不辨細書，以此掩目則明」，靉靆即係阿拉伯文「眼鏡（alunwainat）」嘅音譯，呢度指老花鏡。趙希鵠係1170年至1242年間嘅人，而西方最早關於眼鏡嘅記載係由13世紀後半葉開始，所以有專家推測，眼鏡有可能係由中國發明嘅。咁究竟眼鏡係點樣由中國傳去西方嘅呢？有說法話係由意大利探險家馬可波羅喺元朝嗰陣帶返意大利嘅。至於真相係點，仍有待考證。

原圖嚟自網絡。