之前講到興建輕鐵嘅來龍去脈，今日講埋輕鐵通車點解會更改日子，答案好簡單，因為試車時意外頻生。話說當年輕鐵原本定於1988年8月8日通車，不過由當年3月試車開始，4個月之內先後發生十幾宗事故，導致人命傷亡，當中最嚴重嘅一次，更有一個小童喪命。

1988年7月25日，一架輕鐵列車响青山公路試車，於元朗田廈路撞到一架客貨車，肇事原因係列車車長衝紅燈，事故導致客貨車上嘅8歲男童身亡。眼見發生多次事故，當局於是下令停止試車，並延至一個月多之後嘅9月18日先正式通車。

去到9月通車當日，610、611同612三條分別來往元朗同屯門嘅路線率先開通，之後四條5字頭嘅路線亦先後於第二年6月底前開通，為市民服務。

原圖為輕鐵昔日廣告，取自網絡。