兩岸關係一向係焦點所在，當中嘅起起伏伏更加同社會大眾有密切關係，好似傳媒方面，大家又知唔知台灣第一次有記者去大陸採訪係幾時？答案係1987年。話說1949年當局對台灣實施戒嚴令，去到1987年先至解除，當時台灣第三大報《自立晚報》社長吳豐山諗住搶飲頭啖湯，派記者去大陸做採訪，途中發生唔少插曲，好彩最後都順利成行。

吳社長當年揀選咗兩位年輕記者——34歲嘅李永得同31歲嘅徐璐，取道東京去大陸。1987年9月11日，吳社長親自送兩位記者去桃園機場上機，等到飛機起飛之後，隨即打俾總編輯陳國祥，將嗰日嘅頭版改為《本報特派記者李永得、徐璐由東京赴大陸採訪》。報紙出街之後，台灣當局就聯絡吳社長，話要叫返兩位記者返嚟，但吳社長拒絕。

李永得同徐璐抵達日本之後，就去到中國駐日本大使館申請簽證。當時負責台胞簽証嘅二等秘書馬連印同佢哋講，如果係以探親名義申請入境，可以即刻獲批簽證，但李永得同徐璐堅持喺入境申請上填寫記者身份、採訪為入境目的，最後佢哋喺旅館等咗32小時，簽證先批落嚟。

佢哋隨即買咗第二日（即係9月14日）飛往大陸嘅機票，因為安檢程序導致航班喺9月15日凌晨先至飛抵北京，時任中國新聞社港澳台部主任嘅陳佐洱到場迎接。陳佐洱同兩位記者寒暄一番之後，就陪同佢哋入到去休息廳，原來嗰度有超過50名中外記者等緊，兩位記者一入場隨即被同行包圍，並接受採訪。之後陳佐洱親自送佢哋去長城飯店，仲話想採訪啲咩都可以出聲，會盡量滿足。

李永得、徐璐此行去過北京、杭州、廣州、深圳同廈門五個城市，參觀過故宮、孫中山故居、黃埔軍校舊址等地方，期間採訪中國旅行總社總經理，問到點樣接待大批台灣人返大陸探親等問題，亦訪問過工廠、企業、學校等。佢哋超過十日嘅行程响9月27日結束，返到台灣之後獲吳社長舉行慶功宴，點知見到新聞局要處分李永得、徐璐嘅新聞。不過兩人得到台灣各界聲援，最終令當局放棄處分佢哋同《自立晚報》。

圖為李永得同徐璐，取自網絡。