喺上環地鐵站附近有條叫安和里嘅小路，連接中環九如坊同皇后大道中，不過以前啲人通常都會叫安和里做「二奶巷」，呢個嘅由來有兩個講法，今次就同大家介紹吓。

第一個講法就係話，光緒初年有位姓魏嘅富翁，鍾情妓院一位紅牌阿姑，希望納女方做二奶。不過呢位紅牌阿姑就話唔想做人二奶，認為二奶生嘅仔都係庶出，難以繼承父業，生活無保障，同時又唔想富翁休妻，於是婉拒。富翁提出俾500兩黃金呢位紅牌阿姑，話有呢500兩黃金揸手以後就唔使驚，不過紅牌阿姑就話，驚人以為啲錢係偷返嚟，犯咗「七出之條」中嘅盜竊呢條。

富翁就問，咁除咗錢之外，仲有咩更好嘅保證呢？紅牌阿姑突然提出，只要富翁買一條街嘅樓宇俾佢就肯嫁。富翁即刻應承，買咗安和里附近一帶嘅屋送俾紅牌阿姑，於是兩個人就起埋一齊。呢件事轟動一時，安和里就被稱為「二奶巷」，象徵係魏家二奶所有。

第二個講法其實相當類似，同樣發生响光緒初年，一位姓劉、綽號「劉公白」嘅鴉片煙商有個非常惡嘅太太，因為一直生唔出男丁，於是劉公白就想納個溫柔體貼嘅妾侍。後來劉公白喺妓院鍾情一位歌姬，就重金包咗對方，無幾耐個歌姬就有咗，要求劉公白納佢為妾。

劉公白借助父母、叔伯施壓，正牌劉太終於答應俾丈夫納妾，但點知歌姬生咗個女。劉公白再接再勵，歌姬又有咗，劉公白就話如果今次生嘅係仔，就送一條街俾佢。幾個月後，大婆又有咗，劉公白就話如果佢係生仔，就送一條再大啲嘅街俾佢。結果好事成雙，兩個都生咗仔，劉公白就兌現承諾各自送咗條街俾佢哋，將歌姬嗰條街命名為「安和里」、大婆嗰條街命名為「和安里」，因為兩條街名太似，所以啲人就將安和里稱之為「二奶巷」喇。

圖為安和里，取自網絡。