「我哋大家在獅子山下相遇上，總算是歡笑多於唏噓」，樂壇巨星羅文嘅《獅子山下》，唱出香港人嘅精神，更加响2003年沙士期間用嚟鼓勵大家，成為不朽經典。除咗呢首歌，羅文喺70年代唱過唔少膾炙人口嘅金曲，包括《前程錦繡》、《激光中》、《心裡有個謎》、《波斯貓》等等。羅文本身舞台風格非常獨特，令人留下深刻印象，根據報道，原來佢係首位响1976年利舞臺戲院開演唱會嘅歌手，認真犀利。羅文喺2002年今日因肝癌病逝，終年57歲。

喺1976年，羅文喺利舞臺開15場演唱會，成為首位喺利舞臺開演唱會嘅歌手，呢15場演門會嘅門票一日之內就已經賣晒，自此掀起香港個人演唱會嘅熱潮。到咗1980年喺利舞臺演唱會上，佢一改男歌手硬朗風格嘅形象，著上高踭鞋，以及大量流蘇、羽毛、晶片嘅服飾，令觀眾留下深刻印象。此外，由佢自編自演嘅舞台劇《白蛇傳》亦都係响利舞臺公開演出，可見佢係幾咁鍾意利舞臺。到咗1991年利舞臺拆卸之前，羅文喺度舉行《再見，利舞臺》慈善演唱會，向利舞臺道別。

圖片為羅文《再見，利舞臺》，取自網絡。