喺1950年嘅今日，中國人民志願軍渡過鴨綠江，揭開抗美援朝嘅序幕。韓戰喺當年6月25日爆發，當時北韓軍隊越過三八線打南韓，起初北韓軍隊勢如破竹，將南韓軍隊迫到朝鮮半島南端大邱、釜山一帶。呢個時候，以美國為首嘅聯合國軍出兵支援南韓，隨即扭轉形勢，將北韓軍隊壓返去朝鮮半島北部嘅山區同中朝邊境鴨綠江一帶。

成立無幾耐嘅新中國政府感到自身安全受嚴重威脅，於是派出中國人民志願軍參戰，實行抗美援朝。志願軍參戰之後，聯同北韓軍隊打贏幾場戰役，將聯合國軍推返去三八線附近。到咗1951年7月，美國同中朝雙方展開談判，但就一直處於「邊談邊打」嘅局面，三八線附近不斷爆發衝突。到咗1953年7月，雙方正式簽署停戰協議，停止戰事。戰後估計，中國人民志願軍死亡人數為15萬至40萬人不等，當中包括毛澤東其中一個仔毛岸英。

圖為中國人民志願軍，取自網絡。