上個禮拜講電影《愛你愛到殺死你》,提到男女主角係黎明同鄭秀文,今次一於再介紹黎明拍嘅電影。電影《玻璃之城》可以話係90年代一部經典愛情電影,黎明同舒淇喺戲入面飾演70年代一對學生情侶,後來佢哋分隔兩地,最終分開。之後兩人各自成家立室,多年後再次相遇,情難自禁就發展婚外情,最後雙雙喺英國車禍身亡。《玻璃之城》响1999年嘅香港電影金像獎入面獲得多達12個獎項提名,當年黎明同舒淇亦傳出因為拍攝呢套戲,戲假情真。

唔講唔知,原來導演張婉婷當年搵舒淇做女主角呢個決定,曾經受到唔少質疑。張婉婷曾經講過,當年唔少人質疑舒淇無演大學生嘅氣質,又認為舒淇之前嘅艷星經歷會嚇走投資者,不過張婉婷就堅持舒淇係最適合人選,而男主角黎明亦都力撐舒淇。張婉婷分享過,當年同舒淇講返,話黎明覺得佢好好、可以合作,點知舒淇話「但你無問我鍾唔鍾意同黎明合作」,令張婉婷覺得舒淇超有個性。

相傳黎明同舒淇曾經相戀咗7年咁耐,張婉婷就話唔知拍戲嗰陣係咪已經一齊,但當時佢哋拍戲嘅時候對眼發光,係真係假,就要嘅眼睛雪亮嘅觀眾自行判斷喇。

圖為劇照,取自網絡。