一講起古巴領導人，大家可能比較熟悉革命領袖卡斯特羅，佢擔任古巴領導人接近50年，2008年因為健康問題退任，交棒細佬勞爾。勞爾上任之後，推動古巴展開一系列社會、經濟同政治改革，令人民生活同收入都得到改善。早喺勞爾擔任國防部長期間，佢要求革命武裝部隊以西方市場導向嘅手法經營企業，又派手下去外國商業管理學院讀書。蘇聯喺90年代解體之後，勞爾大力推行市場經濟策略挽救經濟，佢用過一句金句嚟勸服哥哥卡斯特羅接受市場經濟：「大豆比起大炮更加重要。」

2006年勞爾暫代患病嘅卡斯特羅執行主席職務，佢批評以國營企業為主嘅國家經濟無效率。兩年後佢接任古巴領導人，推行超過300項經濟改革措施，包括取消對公民嘅商業同旅行限制、允許部分軍事同基礎設施私有化、開放外國投資等等。

喺勞爾在任期間，古巴1100萬人口當中，自僱人士數目急增3倍至接近60萬人，包括的士司機、民宿老闆、餐廳老闆等等，另外古巴又仿傚中國開設工業園，提供稅務優惠吸引外國投資。勞爾任內最重要嘅政績，相信要數2014年同美國「破冰」、恢復外交關係，重開大使館並簽署幾十份雙邊協議，此後美國遊客數目大幅增加一倍，而美國公司亦陸續去到古巴尋找商機。但自從特朗普上任之後，白宮先喺2017年宣布取消古巴友好政策，其後又指美國駐古巴大使館職員無故身體不適，所以驅逐古巴外交官員報復，令兩國關係轉差。

圖片取自網絡。