前排一套電視劇《金宵大廈》又重新令歌曲〈今宵多珍重〉爆紅，其實呢首歌嘅粵語版係由著名歌手陳百強改編，係陳百強嘅代表作品之一。有「天才歌手」之稱嘅陳百強離世至今已足足26年，今日就等我哋一齊回顧吓呢位樂壇巨星短暫嘅一生。

陳百強嘅父親曾係粵劇社團嘅成員，所以陳百強唔單止有家族遺傳嘅音樂細胞，仲由細個開始已經好有表演慾。喺陳百強少年時期，佢嘅創作、演唱才華已經初露頭角，多次喺公開比賽攞獎。佢甫一推出首張個人專輯《First Love》之後，就憑裡面一隻〈眼淚為你流〉獲得第二屆十大中文金曲獎項。之後陳百強嘅星途亦非常璀璨，先後推出經典作品〈漣漪〉、〈一生何求〉、〈偏偏喜歡你〉、〈有了你〉等，更加係繼歌神許冠傑、林子祥之後，最早踏上紅館演出嘅香港歌手之一。

1992年5月，陳百強被發現喺寓所昏迷，送院搶治。1993年今日，陳百強因腦衰竭病逝，終年35歲。不過佢留低嘅經典歌依然不斷被翻唱、改編，甚至加入影視作品當中，繼續令觀眾留下深刻印象。

原圖嚟自網絡。