早兩日同大家回顧咗冷戰嘅歷史，今日就講多少少美國同蘇聯响冷戰期間點樣拗手瓜。話說喺1962年，美蘇兩國分別計劃於土耳其及古巴部署導彈，蘇聯嘅舉動威脅美國後院，分分鐘會打破兩大陣營嘅核勢力平衡，雙方出動航母、核潛艇等，觸發古巴導彈危機，令全球陷入爆發核戰嘅邊緣。到底當時雙方如何劍拔弩張？最後又點「拆彈」收科？ 

事緣响1959年，以卡斯特羅為首嘅革命起義軍推翻親美政府，建立政權。响1961年4月，美國中央情報局策劃咗「豬灣事件」，企圖推翻古巴革命政權，但行動遭到古巴軍隊徹底粉碎。事件令美國同古巴關係緊張，於是古巴利用美蘇之間嘅矛盾，向蘇聯請求援助。另一方面，美國亦响土耳其部署導彈，射程覆蓋蘇聯西部，包括莫斯科同列寧格勒（而家嘅聖彼得堡）。

蘇聯於是決定支援古巴，1962年雙方簽署導彈協議，於古巴部署中程及中遠程彈道導彈同核彈頭，以及多架戰機及轟炸機。當時美國總統甘乃迪批評，蘇聯喺古巴部署導彈，對所有美洲國家構成安全威脅，又下令封鎖古巴，攔截前往古巴嘅艦隻。美國調動包括8艘航母在內嘅180艘艦隻，同時派出轟炸機攜帶核彈升空以及核潛艇出海。蘇聯方面就企硬，表明會繼續支援古巴，更揚言一旦美國發動戰爭，蘇聯將會以最猛烈嘅方式反擊，又宣布進入最高備戰狀態，令美蘇兩國陷入核戰邊緣。

1962年10月，美國軍艦喺空軍協助之下，攔截蘇聯船隻，呢個時候蘇聯領導人赫魯曉夫改變主意，致電甘乃迪，表示希望尋求解決危機嘅方案。美國亦明白爆發核戰嘅後果，最後雙方達成協議，蘇聯會拆除部署喺古巴嘅導彈，而美國亦承諾拆除喺土耳其部署嘅導彈基地，又保證唔會軍事進攻古巴，導彈危機到此告一段落。

圖為甘乃迪於古巴導彈危機期間會見美軍官員，取自網絡。