今個星期講開冷戰,一於講埋佢點落幕。話說呢場「無煙硝戰爭」,最終隨住蘇聯解體而結束,英國前首相戴卓爾夫人曾經將呢嘅結局「歸功」80年代美國總統列根嘅星球大戰計劃。除咗星球大戰計劃之外,列根政府當年亦利用唔同手段重創蘇聯經濟。蘇聯輾轉經歷一系列失敗嘅經濟同政治改革之後,响1991年12月26日解體,令冷戰步向終結。今日就介紹吓當年列根政府經濟戰同蘇聯解體嘅關係。

當年呢場經濟戰嘅靈魂人物,要數到美國中情局局長凱西(William Casey)。凱西上任之後,中情局加強對蘇聯經濟情報同研究工作,發現蘇聯極度依賴輸出石油賺取外匯,凱西喺一次國家安全計劃小組會議上指出,蘇聯工業自從1970年起停滯不前,多種產品供應不足,另一方面阿富汗戰爭等因素,亦加重蘇聯嘅經濟負擔。凱西提出應該趁呢個機會重創蘇聯,獲得列根首肯。

1982年,美國制定多項政策,包括秘密支持阿富汗伊斯蘭武裝反抗勢力、爭取沙特阿拉伯壓低油價、游說西方盟友禁止向蘇聯輸出高科技、利用星球大戰計劃誘使蘇聯進行軍備競賽,以及縮減西方對蘇聯貸款等。呢一系列政策好快就取得成效,美國不顧以色列同國內猶太人嘅反對,向沙特出售軍備,之後列根接見沙特法赫德國王嘅時候,一方面表示關注沙特國家安全,另一方面表示關注油價走向,認為低油價有利美國經濟。1985年8月,沙特嘅石油產量由每日不足200萬桶,急升至600萬桶,去到秋天更升到900萬桶,11月嘅時候每桶原油維持喺30美元。去到1986年,沙特產油量一度迫近每日1000萬桶,令油價跌到每桶8美元。中情局1986年嘅報告指出,蘇聯因油價下跌導致每年減少130億美元收入,軍火貿易收入亦備受打擊。

外匯收入減少,令蘇聯民生必需品嚴重缺乏,又無錢增加產能,令經濟陷入惡性循環。同時,列根政府繼續打擊蘇聯經濟,凱西以退休金融家身份出席銀行業高層會議,披露中情局資料,說服與會者收緊對蘇聯信貸,令蘇聯連錢都借唔到,迫使當時蘇聯領導人戈爾巴喬夫同列根喺雷克雅未克會議上,提出撤除核武器換取美國放棄星戰計劃,但被列根一口拒絕;另一方面蘇聯又希望說服西方國家放寬對蘇聯技術同信貸制裁,但美國就堅持蘇聯必須改善人權、自由化,先至會考慮放寬制裁。

戈爾巴喬夫唯有提出政治改革,但估唔到之後會出現各加盟共和國同東歐各國爭取獨立嘅浪潮,撼動蘇聯體制,最終導致蘇聯响1991年解體。

圖為戈爾巴喬夫同列根會面,取自網絡。