近日响網上見到一張學校中史教材嘅相，內容係介紹點解中英會爆發鴉片戰爭。初初望落好正常，不過離奇就離奇在，份教材完全無提過鴉片兩隻字，可以話完全顛覆曬大家嘅認知。被視為中國近代史開端嘅鴉片戰爭，究竟同鴉片有咩關係？又同香港歷史有咩關係？即刻簡介過大家知。

鴉片戰爭梗係同鴉片有關，話說明朝末年興起食鴉片，去到清朝雍正年間，曾經下令禁止鴉片，不過執行嗰時唔夠嚴格，自然無咩效。之後外國輸入嘅鴉片越嚟越多，而清廷出口嘅絲綢、茶葉等貨物價值都冚唔到條數，導致白銀大量外流。

眼見民窮國困，道光皇帝命欽差大臣林則徐禁煙，繼而出現虎門銷煙、林維喜事件、官涌之戰等，掀起鴉片戰爭序幕。清廷戰敗後，被逼同英國簽訂喪權辱國嘅《南京條約》，條款包括割讓香港島過英國；開放廣州、廈門、福州、寧波同上海五地作為通商口岸，打開國門；協定關稅；英國人响中國犯事唔受中國法律制裁等，自此中國被迫打開國門，亦喪失關稅自主權、領事裁判權等。鴉片戰爭之後，主角鴉片嘅貿易得以合法化，導致佢嘅禍害延續至清廷被推翻後仍未止息。

原圖嚟自網絡。