旺角有一條花園街,中環有一條花園道,但唔講唔知,原來以前九龍都有條花園道㗎喎,佢就係而家嘅漢口道喇。至於點解以前會叫做花園道呢?話說喺尖沙咀發展初期,政府為咗鼓勵多啲外商喺度起樓居住,於是就將尖沙咀規劃成一個好優美嘅居住環境,種植大量樹木,又响依家中間道停車場一帶起座公園,當時漢口道係响呢座公園旁邊,所以就命名為花園道。

雖然尖沙咀嘅花園道當時同中環花園道撞名,但啲人寄信寫地址都會寫明係「香港花園道」或「九龍花園道」,所以都唔會寄錯。到咗1909年香港政府整理街道名,就將部分撞名嘅街道改名,所以九龍花園道改名為漢口道,而「漢口」呢個名就係取自湖北漢口。後來漢口道發展出一條較短嘅橫街,於是就用湖北另一個較細嘅城市宜昌嚟命名,名為宜昌街。

原圖嚟自網絡。