最近日本同南韓關係認真麻麻地，除咗經濟議題之外，兩國人民對過往嘅歷史事件亦有不同看法。响1909年嘅今日，韓國槍手安重根刺殺日本「明治憲法之父」、前首相伊藤博文，安重根隨即被捕，翌年3月喺旅順監獄因為謀殺罪成被處死。直到現代，安重根依然被韓國人視為民族英雄，但佢嘅屍首就一直下落不明。安重根曾經喺遺囑要求，待國家恢復主權之後，要將佢重新埋葬喺韓國土地，而南韓當局亦曾經向日本索取安重根落葬資料，但不獲回應。

話說响日俄戰爭之後，日韓1907年簽署《第三次日韓協約》，自此韓國就成為日本嘅保護國，伊藤博文獲委任成為「韓國統監」。1909年10月26日朝早，伊藤博文搭火車到訪哈爾濱，準備同俄國財政部長戈果甫佐夫談判，解決日俄爭端。戈果甫佐夫到車站迎接，等伊藤博文落車之後，俄國軍樂隊開始演奏，二人一齊檢閱俄國軍隊，呢個時候混入日本僑民當中嘅安重根開槍，打中伊藤博文左胸、左腰同腹部。安重根被一班俄國憲兵捉住，而伊藤博文就被扶返入火車，無幾耐之後就逝世。

安重根被捉拿之後，喺翌年被日本絞殺，自此成為韓國人嘅民族英雄，而日本人就將佢視為罪犯同恐怖份子。

原圖取自網絡。