喺19世紀末,日本開始殖民統治台灣,並且以高壓手段壓榨台灣原住民,台灣出現多次抗日活動,最著名嘅要數1930年10月27日發生嘅「霧社事件」。霧社位於台灣中部,當時係賽德克族人居住嘅地方,日本嘅山地警察長年對原住民壓迫剝削,強制勞役,又誘姦婦女,激起民眾強烈憤怒。頭目莫那.魯道趁住霧社公學校舉行聯合運動會、有大批日本警察同家眷聚集嘅機會,率領族人發難,攻擊日本警察嘅駐地,搶走武器。莫那.魯道率領中老年族人喺後山埋伏,長子達多.莫那則率領年輕族人喺運動場周邊埋伏,齊齊於升旗儀式時槍殺日本人,造成132名日本人死亡、2名漢人被誤殺。

雙方其後激烈交戰,日軍處於弱勢,但到咗11月,日方投入大量現代化武器,逐漸扭轉形勢。大批賽德克族人家屬吊頸自殺,希望族人可以無後顧自憂、奮勇殺敵。後來,日軍出動飛機空投毒氣彈,令大部分起義嘅賽德克族人死亡。莫那.魯道同達多.莫那亦先後自殺,最終歷時50幾日嘅霧社事件結束,超過600名族人死亡。

事件結束之後,其餘嘅賽德克族人遭到報復,被迫移居到川中島(現今位於南投嘅部落),有人因為唔適應環境、過度勞役、思親等原因而自殺,或者逃亡被殺。2011年電影《賽德克.巴萊》就係取材自霧社事件,當年引起港台唔少人對呢段歷史嘅關注。

圖為《賽德克.巴萊》劇照,取自網絡。