之前介紹咗黎明主演嘅兩套電影《愛你愛到殺死你》同《玻璃之城》,今次就介紹吓佢演出過嘅劇集喇。黎明同周海媚喺1989年拍咗套劇集《回到未嫁時》,劇集响1990年播出,阿史一睇呢個名就聯想到美國科幻電影《回到未來》系列,而兩者之間同樣係有穿越元素,不過內容就好唔同喇。

喺劇入面,黎明同周海媚飾演一對情侶,結婚兩年之後就出現咗婚姻危機,呢個時候周海媚就因為一次意外返到去4年前(即係1986年)。當時周海媚仲未認識黎明,正當周海媚諗盡辦法返去1990年,周海媚就失去咗未來嘅記憶,如是者佢就按照以前嘅軌跡,同黎明戀愛、結婚,點知去到結婚前周海媚恢復返未來嘅記憶,佢知道結婚之後會點,就決定逃婚。不過輾轉經歷好多事之後,周海媚最終都選擇同黎明一齊,返到未來之後仲恩愛過以前,有個美滿結局。

圖為劇照,取自網絡。