今日係香港電影之父黎民偉逝世66周年，佢除咗對香港乃至中國電影嘅發展有開拓、奠基嘅貢獻，更加係記錄孫中山生前事蹟嘅重要人物。

黎民偉自1909年加入同盟會，辛亥革命嘅爆發令佢產生一個——「電影救國」。1914年，黎民偉同美國嘅布拉斯基一拍即合，造就咗電影《莊子試妻》嘅誕生，開創香港電影嘅新一頁。1922年，黎民偉創辦香港第一家全華資嘅電影製片機構「民新製造影畫片有限公司」，為咗令新公司有穩定收入、拍出好嘅電影，黎民偉不惜多次將房產抵押，為電影事業盡心盡力。

故事片以外，黎民偉對紀錄片嘅拍攝手法、技巧亦對後世影響深遠。黎民偉嘅紀錄片力求真實，務求用電影「啟發民智、愛國教民、導人向善」，佢嘅選材多數以孫中山事蹟為主。孫中山由1921年返廣州之後嘅每次行動，黎民偉都有文字或影片記載。而黎民偉拍嘅相關紀錄片，據《中國銀壇外史》所載：「花了不少本錢，政府或國民黨黨部從來沒有費用津貼過。」因此孫中山特登送咗一幅「天下為公」嘅墨寶予黎民偉，以表彰黎民偉對電影業嘅貢獻。

圖為黎民偉同孫中山墨寶，原圖嚟自網絡。