喺2003年，香港爆發咗沙士疫症，當時唔少移民顧問公司負責人都話，沙士期間收到唔少移民海外嘅查詢，比起沙士爆發前增加咗2成，而考慮移民嘅原因主要包括「認為香港整體經濟唔好」、沙士事件暴露「政府做事唔夠果斷」，以及「人口密集導致衛生情況欠佳」等等。

曾經有一位30幾歲嘅公立醫院醫生接受訪問嘅時候講過，經歷沙士一役之後，認為「政府官員罔顧公眾利益」，對疫情「冚得就冚」，再加上香港失業率高，資產價值下跌7成，於是決心移民，希望子女將來有更好嘅生活，但無奈因為自己嘅物業變成負資產，先至導致無法移民。

根據保安局資料，2003年估計有9600人移民外地，從數字上嚟睇係連續9年下跌，但有移民顧問就明言，當時港人嘅移民情緒之高，可以話係自1997年以來少見嘅。

圖片為沙士期間淘大花園商場，取自網絡。