香港宜家嘅付款方式咁多,唔少人出街都唔鍾意帶錢,比較重嘅神沙更加無乜人肯帶。講起香港神沙,乃至港元制度,原嚟直至1863年先開始確立。

喺港幣出現之前,香港市面流通嘅都係中國嘅貨幣,對外交易相當不便,於是時任港督羅便臣就開始研究香港自己嘅貨幣。佢先喺英國訂製咗3種硬幣嚟香港做輔幣,而香港銀元就喺麥當奴做港督嘅時候先出現。1866年,麥當奴喺宜家銅鑼灣嘅糖街主持香港造幣廠揭幕儀式,由當時嘅輔政司孖沙發表造幣廠嘅執行佈告,從此香港有咗自己嘅鑄幣廠。

當時由香港造幣廠鑄造嘅香港一元銀元,正面係維多利亞女王像,上下邊都係英文,而背面就係中文鑄字。除咗一元之外,當年仲有半元銀元,即係宜家嘅五毫,而半毫銀幣就係五仙。

圖為1866年香港一元,原圖嚟自網絡。